Morgunverður er snæddur snemma því framundan er löng og spennandi leið í gegnum Namib Naukluft Park til Swakopmund á vesturströndinni. Namib Naukluft Park er stærsti þjóðgarður Afríku og inniheldur elstu eyðimörk heims. Þar munum við meðal annars keyra framhjá hinum gullnu stóru sandöldum, stoppa við hin frægu Quiver tré, dáðst að Naukluft fjallgarðinum og skima eftir dýralífi.

Hádegisverður er snæddur áleiðis á heillandi stað sem heitir Solitaire, litlum stað í miðri eyðimörk mörg hundruð kílómetra frá næsta byggða bóli. Þar stutt frá er Steingeitarbaugur (Tropic of Capricorn), sá breiddarbaugur á suðurhveli jarðar þar sem sól er í hvirfilpunkti á sólstöðum.

Solitaire samanstendur af bensínstöð, verslun, kapellu og bakaríi með kaffihúsi. Kaffihúsið er vel þekkt fyrir eplaköku sína, án efa „bestu í allri Namibíu“.

Staðurinn var stofnaður árið 1884 og er nafnið dregið af orðinu einsemd.

Það fyrsta sem vekur athygli gestsins þegar hann kemur til Solitaire er gnægð bílflaka sem skreyta vegarkantinn. Það er næstum eins og að ganga inn í Tinna bók að koma að þessu einstaka bílasafni.

Swakopmund er svo sérstakur bær að það er erfitt að lýsa honum í fáum setningum.  Bærinn er staðsettur við ströndina, þar sem Atlantshafið og Namib eyðimörkin mætast og er frægur fyrir þýskt yfirbragð í byggingum og götulífi.

Innifalin er ferðin “Sandwich Harbor” sem er án efa ein af uppáhalds ferðum okkar, þar sem sandöldurnar mæta úthafinu, hluti af hinu svokallaða Sandsjó umhverfi sem er á heimsminjaskrá UNESCO. Hér er keyrt í gegnum Walvis Bay og þaðan inn í Namib Naukluft þjóðgarðinn, sem er eitt elsta landsvæði heims. Jepparnir keyra upp sandöldurnar og hápunktur ferðar er að sjá sandöldur Namib eyðimerkurinnar snerta Atlantshafið.

Kvöldið er frjálst fyrir gesti að rölta um bæinn og njóta kvöldverðar á einum af hinum fjölmörgu veitingastöðum Swakopmund.

Úrval af ævintýralegum afþreyingum er mikið í Swakopmund. Fyrir þá ævintýragjörnu er hægt að fara í fallhlífastökk með ótrúlegt útsýni yfir elstu eyðimörk í heimi, Atlantshafið og Swakopmund, aka fjórhjóli í eyðimörkinni, renna sér á sandbretti niður sandöldurnar svo eitthvað sé nefnt.

Ferðin “the little five” er mjög vinsæl, þar sem farið er í eyðimörkina með reyndum leiðsögumanni og eyðimerkurfánan og flóran skoðuð.

Aðrar ferðir eru t.d. að fara á kameldýrabak, fara í loftbelgjaferð yfir elstu eyðimörk í heimi, leigja “fatbike” og hjóla um bæinn og eyðimörkina sem umkringir hann.

Kvöldið er frjálst fyrir gesti að rölta um bæinn og njóta kvöldverðar á einum af hinum fjölmörgu veitingastöðum Swakopmund.

Þrátt fyrir allar afþreyingarnar sem eru í boði í Swakopmund má ekki gleyma að njóta verunnar í bænum, sem er þekkt fyrir afslappað umhverfi, þýska byggingarlist, góðan mat, vín og bjór.

Kvöldið er frjálst fyrir gesti að rölta um bæinn og njóta kvöldverðar á einum af hinum fjölmörgu veitingastöðum Swakopmund.