Við snæðum morgunverð snemma því að framundan er löng og spennandi ferð í gegnum Namib Naukluft Park til Swakopmund á vesturströndinni. Namib Naukluft Park er stærsti þjóðgarður Afríku og í honum er elsta eyðimörk heims. Þar ökum við meðal annars framhjá stóru, gullnu sandöldunum, dáumst að Naukluft-fjallgarðinum, skimum eftir dýralífi og skoðum þekkt tré, sem nefnast „Quiver trees” á ensku og finnast aðeins í sunnanverðri Afríku. Enska heitið er dregið af því að frumbyggjar, sem nefnast búskmenn eða san-fólkið, notuðu greinar trjánna til að búa til örvamæla (e. quivers).

Við snæðum hádegisverð á heillandi stað sem heitir Solitaire og er í miðri eyðimörk mörg hundruð kílómetra frá næsta byggða bóli. Þar stutt frá er Steingeitarbaugur (Tropic of Capricorn), eða hvarfbaugurinn syðri, sú breiddargráða á jörðinni þar sem sól er í hvirfilpunkti við vetrarsólstöður.

Í Solitaire er bensínstöð, verslun, kapella og bakarí með kaffihúsi, sem er þekkt fyrir eplaböku sína, án efa þá „bestu í allri Namibíu“.

Staðurinn var stofnaður árið 1884. Nafnið er réttnefni því að Solitaire getur bæði þýtt einsemd og eingreypingur, eða gimsteinn sem er greyptur einn sér. Solitaire er svo sannarlega einstakur gimsteinn.

Það fyrsta sem vekur athygli gestsins þegar hann kemur til Solitaire er gnægð bílflaka sem skreyta vegarkantinn. Það er næstum eins og að ganga inn í Tinna-bók að koma að þessu einstaka bílasafni.

Kvöldin eru frjáls fyrir gesti sem geta rölt um bæinn og notið kvöldverðar á einhverjum af fjölmörgum veitingastöðum Swakopmund.

Swakopmund er svo sérstakur bær að erfitt er að lýsa honum í fáum setningum.  Bærinn liggur við ströndina þar sem Atlantshafið og Namib-eyðimörkin mætast og er frægur fyrir þýskt yfirbragð bygginga og götulífs.

Mikið úrval er af ævintýraferðum og afþreyingarkostum í Swakopmund. Fyrir þá ævintýragjörnu er í boði að fara í fallhlífarstökk með ótrúlegt útsýni yfir elstu eyðimörk í heimi, Atlantshafið og Swakopmund, aka fjórhjóli í eyðimörkinni, renna sér á sandbretti niður sandöldurnar, svo fátt eitt sé nefnt.

Ferðin „the little five” er mjög vinsæl, í henni er farið í eyðimörkina með reyndum leiðsögumanni til að skoða fánu hennar og flóru.

Í dag er farið í skipulagða jeppaferð, „Sandwich Harbour”.

Í þessari ferð ökum við meðfram sjónum inn í eyðimörkina sem umlykur Swakopmund, undrumst fegurð bleikra saltsléttna, sem mynduðust á botni uppþornaðra vatna í eyðimerkurdældum, og dáumst að dýrðarsýninni sem blasir við okkur í Namib Naukluft-þjóðgarðinum „þar sem haf og sandöldur mætast“.  Á leiðinni verður dekrað við okkur með freyðivíni og alls konar snarli.

Leiðsögufólk okkar er skemmtilegt, frótt og hefur brennandi áhuga á heimalandi sínu og sögu þess. Þau koma úr ýmsum áttum með mismunandi bakgrunn en eiga öll það sameiginlegt að gjörþekkja flóru og fánu svæðisins og eru frábært sögufólk.

Þrátt fyrir alla afþreyingarkostina sem eru í boði í Swakopmund má ekki gleyma að njóta verunnar í bænum, sem er þekktur fyrir afslappað umhverfi, þýska byggingarlist, góðan mat, vín og bjór.